“Mos u bëni avokatë, bëhuni hidraulikë” – ‘Kumbari i inteligjencës artificiale’ paralajmëron për punët që do të mbijetojnë ndaj IA-së

Ish-punonjësi i Google, Geoffrey Hinton, i njohur si “kumbari i inteligjencës artificiale”, është bërë zëri paralajmërues për rreziqet që sjell përparimi i shpejtë i inteligjencës artificiale (IA). Edhe pse ai ka ndihmuar në zhvillimin e teknologjive që përdor sot bota, Hinton la Google në vitin 2023 për t’i tërhequr vëmendjen botës ndaj kërcënimeve që mund të sjellë IA, madje duke e quajtur atë një rrezik ekzistencial për njerëzimin.

Në një intervistë me Steven Bartlett në podkastin “Ditari i një CEO”, 77-vjeçari tha se nëse nuk ndërmerren masa urgjente, njerëzimi mund të jetë afër fundi.

Duke folur për karrierat që do të jenë më të sigurta ndaj automatizimit dhe IA-së, Hinton u shpreh:

“Do të kalojë shumë kohë para se makineritë të jenë aq të mira në manipulimin fizik sa ne, prandaj një zgjedhje e mirë është të bëhesh hidraulik.”

Ai vuri në dukje se profesione si avokatët dhe kontabilistët janë në rrezik të madh për t’u zëvendësuar nga inteligjenca artificiale në të ardhmen e afërt.

Hinton theksoi se rolet që kërkojnë aftësi fizike dhe ndërveprim njerëzor, si hidraulikët, do të jenë më pak të prekura.

Kjo pikëpamje përputhet me shqetësimet e shumë ekspertëve të tjerë, përfshirë edhe Elon Musk, i cili në një intervistë për CNBC u shpreh se ndonëse nuk është e lehtë të parashikosh të ardhmen e karrierave në epokën e IA-së, është e rëndësishme që njerëzit të ndjekin pasionet dhe të kontribuojnë në mënyrë pozitive në shoqëri.

Musk shtoi:

“Inteligjenca artificiale mund të bëjë shumë gjëra dhe shpesh më duhet të pezulloj mosbesimin për të mbajtur motivimin.”

Ai këshillon që njerëzit të zgjedhin punë që i gjejnë interesante dhe përmbushëse.