“Më mirë ta djeg sesa të bie në burg”/ Bisedat sekrete të “Gesit”! I frikësuar për tradhti brenda grupit: Duhet asgjësuar…
Në përgjimet e siguruara nga hetuesit, Orges Molla, i njohur me nofkën “Gesi”, shfaqet si koordinuesi kryesor i një grupi kriminal me rrjet të gjerë, duke shprehur shqetësimin e thellë për rrezikun që i kanoset grupit të tyre.
Në një bisedë të koduar me bashkëpunëtorin e tij, të zbardhur nga REPLIKË, Molla tregon gatishmërinë për të djegur çdo provë dhe për të filluar nga e para, në rast se do të zbulohen nga policia.
Orges Molla: Nëse na gjejnë, më mirë djegim gjithçka. Nuk ia vlen të kalojmë 30 vjet në burg për këtë.
Bashkëpunëtori: Po, kjo është luftë, çdo gabim është fatal. Tradhtia do na shkatërrojë më shumë se policia.
Në vijim, Molla tregon një klimë të rënduar besimi brenda grupit, ku dyshimet për tradhti dhe informatorë janë bërë një shqetësim i madh.
Orges Molla: Kam kontrolluar, por nuk mund t’i besoj më as kujtdo. Duhet të mbyllim gjithçka që nuk është urgjente dhe të presim sinjalin.
Bashkëpunëtori: Sinjalin? Kur do të vijë? Po ndjehem i rrezikuar, kam ndjerë se dikush nga brenda po na jep informacione.
Orges Molla: Po, po e ndiej edhe unë. Janë njerëz që mendojnë vetëm për veten, tradhtia është armiku ynë më i madh. Këto ditë duhet të jemi të heshtur, të veprojmë vetëm në emergjencë.
Biseda tregon edhe strategjinë e grupit për shpërndarjen e pjesëtarëve në grupe më të vogla, me qëllim mbijetesën dhe shmangien e arrestimeve masive.
Orges Molla: Përgatitini njerëzit, mund të na duhet të shpërndajmë disa grupe, që të mos bien të gjithë bashkë.
Bashkëpunëtori: Po, ndarja është e vetmja mënyrë për të mbijetuar. Po a ke lajme për transportin e fundit?
Orges Molla: Jo, nuk kemi lajme të sigurta. Ai karvan nuk duhet të ndalet në pika që shihen lehtë. Nëse na kapin aty, është katastrofë.
Orges Molla: Mbaje fort, çdo shenjë tradhtie duhet asgjësuar menjëherë, përndryshe i bëjmë punë policisë.
Bashkëpunëtori: E di, por kjo po i lodh njerëzit, presioni po rritet.
Orges Molla: Presioni është pjesë e lojës, kush nuk përballon, ikën. Ne nuk kemi hapësirë për dobësi.