Kretë/ Shkatërrohet rrjeti kriminal që trafikonte mijëra fishekë nga Shqipëria – Mes të arrestuarve edhe një shqiptar

Një operacion i madh policor është finalizuar në Greqi, ku autoritetet kanë çmontuar një organizatë kriminale që trafikonte në mënyrë të paligjshme fishekë nga Shqipëria drejt Greqisë, me qëllim tregtimin e tyre në ishullin e Kretës dhe në zonat e tjera të Greqisë së Veriut.

Sipas Policisë Helenike, operacioni u zhvillua në bashkëpunim mes forcave të Antikrimit të Organizuar të Kretës dhe Veriut të Greqisë, duke çuar në arrestimin e pesë personave, katër prej të cilëve janë pjesëtarë të organizatës dhe një blerës i fishekëve në Kretë. Ndaj tyre, si dhe ndaj një personi tjetër që ndodhet në kërkim, është ngritur dosje penale për “organizim kriminal” dhe “trafikim të paligjshëm armësh dhe municionesh”.

Si vepronte organizata

Hetimet zbuluan se që nga prilli i vitit 2025, anëtarët e grupit kishin krijuar një strukturë të mirëorganizuar për importin e paligjshëm të fishekëve nga Shqipëria, të cilët më pas i shisnin në tregun e zi në Kretë, me qëllim përfitimin financiar. Ata mblidhnin paraprakisht porositë dhe siguronin municionin përmes një furnizuesi shqiptar, identiteti i të cilit nuk është bërë publik.

Transporti kryhej nga tre persona që udhëtonin me dy mjete, prej të cilëve një ishte kamion i modifikuar me vend të fshehtë (kryepërdorur për të futur fishekët kontrabandë). Pas marrjes së fishekëve në kufi, ata ktheheshin në Kretë përmes rrugëve tokësore dhe linjave detare, ku municionet shpërndaheshin më pas për shitje.

Roli i secilit anëtar

• 65-vjeçari, udhëheqësi i grupit, koordinonte porositë, mbikëqyrte marrjen e fishekëve në kufi dhe realizonte shitjet në Kretë.
• 72-vjeçari, kishte përshtatur vendin e fshehtë brenda kamionit dhe shoqëronte udhëheqësin në transport.
• 73-vjeçari, ishte shoferi kryesor i kamionit gjatë rrugës për në kufi dhe kthimit në Greqi.
• 41-vjeçari me nënshtetësi shqiptare, kishte për detyrë sigurimin e fishekëve nga bashkëkombësi i tij dhe dorëzimin e tyre në kufi.
• 30-vjeçari, i arrestuar në Kretë, kishte blerë më parë fishekë nga drejtuesi i grupit.

Për të shmangur kontrollin policor, grupi përdorte:

• kamion të regjistruar në emër të një të vdekuri, që është ende nën hetim si është futur në përdorim nga ta;
• falsifikim të dokumenteve dhe të dhënave identifikuese për biletat detare;
• fikje të celularëve gjatë transportit dhe masa të tjera sigurie.

Sekuestrimet dhe të kaluarat penale

Gjatë operacionit, në momentin e dorëzimit të fishekëve, u arrestuan 65-vjeçari, 72-vjeçari dhe 73-vjeçari, ndërsa 41-vjeçari shqiptar u arrestua në Kastoria nga forcat e Antikrimit të Organizuar të Greqisë së Veriut. Në kamionin e ndaluar u gjetën të fshehura 24.126 copë fishekë, një pushkë luftarake, një shumë prej 900 eurosh, si dhe një motoçikletë, kamion dhe një makinë tip veturë, të cilat u sekuestruan si prova materiale.

Gjithashtu, u bë e ditur se 65-vjeçari ishte arrestuar edhe në vitin 2019 për një rast të ngjashëm, ndaj të cilit ishin vendosur më parë masa kufizuese.