Kievi merr dritën jeshile për të goditur brenda Rusisë, kancelari Merz: S’ka më kufizime!

Ukraina ka marrë zyrtarisht lejen nga aleatët perëndimorë për të përdorur armët e furnizuara nga ta për të goditur objektiva ushtarake thellë brenda territorit të Rusisë. Lajmin e konfirmoi kancelari i ri gjerman, Friedrich Merz, në një deklaratë të fortë gjatë një konference për shtyp të mbajtur të hënën në Berlin.

“Nuk ka më absolutisht asnjë kufizim në rrezen e veprimit për armët që i dorëzohen Ukrainës, as nga Britania, as nga Franca, as nga ne, as nga amerikanët. Ukraina mund të mbrohet duke sulmuar pozicione ushtarake edhe në Rusi,” deklaroi Merz, duke i dhënë një përkrahje të paprecedentë ofensivës ukrainase.

Ky vendim i rëndësishëm vjen pas një vale sulmesh të mëdha me drone nga Rusia ndaj Ukrainës, të cilat përbëjnë ofensivën më intensive që nga fillimi i luftës në vitin 2022. Aleatët perëndimorë duket se kanë zgjedhur të forcojnë pozitat ushtarake të Kievit, duke i dhënë një mesazh të qartë Kremlinit.

Ndërkohë, Kremlini reagoi ashpër ndaj njoftimit. Zëdhënësi Dmitry Peskov e cilësoi këtë një “vendim të rrezikshëm” dhe në kundërshtim me çdo përpjekje për zgjidhje paqësore. “Ky vendim është në kundërshtim me aspiratat tona për një zgjidhje politike,” tha ai për agjencinë TASS.

Presidenti francez Emmanuel Macron, duke folur nga Vietnami, komentoi gjithashtu zhvillimet e fundit duke u shprehur se Donald Trump po fillon të kuptojë gënjeshtrat e presidentit rus Vladimir Putin. Ai shtoi se shpreson që “zemërimi i presidentit amerikan ndaj Putinit të shndërrohet në veprim.”

Presidenti amerikan Donald Trump, nga ana e tij, ka shprehur zhgënjimin për vonesat në përpjekjet për arritjen e një armëpushimi dhe ka kritikuar veprimet e Kremlinit. Në një postim të fundit në rrjetet sociale, ai e quajti Putinin “të çmendur fare” dhe tha se po mendon vendosjen e sanksioneve të reja ndaj Moskës.