Bisedimet ndërmjet delegacioneve amerikane dhe ruse në Riad për Ukrainën dhe rivendosjen e marrëdhënieve mes dy vendeve janë mbyllur me sukses.
Takimi zgjati 4 orë e gjysmë dhe u zhvillua në Pallatin Diriyah, në kryeqytetin e Arabisë Saudite.
Departamenti i Shtetit raporton se ministrat e Jashtëm të SHBA-së dhe Rusisë, Marco Rubio dhe Sergey Lavrov ranë dakord të krijojnë një mekanizëm konsultimi për të adresuar pikat e fërkimit në marrëdhëniet dypalëshe, si dhe për të caktuar grupe të nivelit të lartë që do të punojnë për të formuar një rrugë drejt përfundimit – sa më shpejt të jetë e mundur – luftës në Ukrainë.
Sipas zëdhënëses së Departamentit Amerikan të Shtetit, Tammy Bruce, të dyja palët do të fillojnë gjithashtu të marrin në konsideratë “bashkëpunimin e ardhshëm për çështjet me interes të ndërsjellë gjeopolitik dhe mundësitë historike ekonomike dhe investuese që do të lindin nga një përfundim i suksesshëm i konfliktit në Ukrainë”.
Këshilltari kryesor i politikës së jashtme të Rusisë, Yuri Ushakov, tha se negociatat “shkuan mirë” dhe se ishte “një diskutim serioz për të gjitha çështjet”. Ai gjithashtu theksoi se u diskutuan kushtet për një takim mes Trump dhe Putinit, megjithëse ai vuri në dukje se nuk ka gjasa të ndodhë javën e ardhshme.
Në të njëjtën kohë, kreu i Fondit të Investimeve Ruse, Kirill Dmitriev, i tha televizionit shtetëror rus Channel One:
“Një dialog shumë pozitiv, konstruktiv ka filluar. Ndryshe nga administrata Biden, e cila nuk u përpoq kurrë të dëgjonte qëndrimin e Rusisë, kjo ishte një përpjekje shumë e qartë për të filluar një dialog, për të kuptuar pozicionin e Rusisë dhe për të diskutuar gjërat për të cilat jemi dakord. Ka shumë pika për të cilat jemi dakord. Ne u njohëm shumë më mirë. Ne e kuptojmë njëri-tjetrin shumë më mirë tani”.
Dmitriev shtoi se zyrtarët e trajtuan njëri-tjetrin me respekt, por shtoi se është “shumë herët për të folur për kompromise”.