Kardinalët mbyllen në kapelën Sistine, ja si zgjidhet Papa i ri dhe kush është favorit sipas … basteve
Mes zisë për humbjen e Papa Françeskut , sot, pritet të caktohet data e hapjes së Konklavës, e cila do të zgjedhë kreun e ri të Kishës Katolike Romake.
Kardinalët do të mbyllen në Kapelën Sistine për aq kohë sa të duhet derisa të dalë tym i bardhë, ndërsa të paktën 20 janë favoritët për fronin papal.
Kardinalët takohen çdo ditë, luten dhe diskutojnë për karakteristikat që duhet të ketë Papa i ri, pasi mbledhja e parë e Konklavës, e cila do të zgjedhë pasuesin e Françeskut, pritet të mbahet më 5 ose 6 maj.
FAVORITËT
Më shumë se 20 kardinalë konsiderohen kandidatë të mundshëm. Megjithatë, nuk dihet se kush e ka epërsinë, pasi të dhënat kanë ndryshuar prej kohësh. Papa Françesku emëroi mbi 100 kardinalë të rinj, uli ndjeshëm kufirin e moshës dhe zgjodhi shumë nga jashtë Evropës dhe vende më të vogla.
Në vitin 2013, kardinalët evropianë kaluan 50%, ndërsa tani përqindja është ulur në 39%. E sigurt është se për zgjedhjen e Papës së ri do të ketë një përplasje mes progresistëve dhe konservatorëve.
Sipas një gazetari të RAI: “Është një grup kardinalësh që janë më afër politikës së Papa Françeskut, duke përfaqësuar 44.4% të kardinalëve që votojnë.
Më pas është grupi i të moderuarve me gati 37%. Ai është gjithmonë pranë Papa Françeskut, por me një qëndrim më pak tolerant për disa çështje sociale, si homoseksualiteti.
Dhe së fundi, grupi konservator me 18.8% janë më tradicionalët”.
Sipas televizionit italian, nga këto grupe dallohen nëntë kardinalë. Mes tyre është edhe Pietro Paolin, një bashkëpunëtor i ngushtë i Papës së ndjerë, i cili konsiderohet si më i mundshmi nga të moderuarit për të vazhduar vizionin e Françeskut dhe është gjithashtu favorit i basteve në Mbretërinë e Bashkuar.
Procesi zgjedhor
Kardinalët votojnë një herë në ditën e parë dhe më pas ka katër votime çdo ditë, dy në mëngjes dhe dy pasdite derisa Papa i ri të zgjidhet me një shumicë prej 2/3.
Kur dyert mbyllen, Kardinalët betohen për fshehtësi absolute. Të gjithë e shkruajnë zgjedhjen e tyre në një fletë votimi dhe e vendosin në enë speciale. Ata përdorin fontin e tyre, por lejohet ta shtrembërojnë në një farë mënyre, në mënyrë që të mos kuptohet se kush voton për kë.
Pasi zgjidhet Papa i ri, ai transferohet në Sallën e Lotëve pranë Kapelës Sistine. Atje ai vesh petkat e bardha, të cilat janë të qepura në tre madhësi të ndryshme. Tymi i Bardhë pasohet nga shpallja e rezultatit.