Japoni, çelin lulet e qershisë sakura – simbol i pranverës dhe hanamit
Në Japoni ka nisur sezoni i lulëzimit të luleve të qershisë, të njohura si sakura, një simbol i kulturës japoneze. Në rrugët dhe parqet e Tokios, pemët e qershisë kanë krijuar peizazhe magjike me lulet e tyre të bardha dhe rozë, duke tërhequr turistë dhe entuziastë të fotografisë.
Sezoni i sakurës shënon gjithashtu fillimin e hanamit, traditës japoneze të admirimit të luleve të qershisë dhe festimit të pranverës me pikniqe në natyrë. Këtë vit, pas kufizimeve të pandemisë, hanami do të festohet për herë të parë pa asnjë masë kufizuese që nga viti 2019, duke mirëpritur edhe turistët e huaj që më parë nuk mund të vizitonin Japoninë për shkak të krizës shëndetësore.
Mediat japoneze ndjekin nga afër këtë ngjarje, duke bërë parashikime për kalendarin e lulëzimit në të gjithë vendin, ndërsa në mbrëmje, ndriçimi i veçantë në tempujt dhe parqet e mbushura me sakura krijon një atmosferë të mrekullueshme për vizitorët.