Izraeli pranon armëpushimin dypalësh me Iranin: Nëse Teherani e shkel…

Izraeli konfirmon se ka rënë dakord me propozimin e SHBA-së për një armëpushim dypalësh me Iranin, por do të “përgjigjet me forcë” ndaj çdo shkeljeje të armëpushimit.

Në një deklaratë të lëshuar nga zyra e Kryeministrit Benjamin Netanjahu, thuhet se Izraeli do t’i qëndrojë marrëveshjes për armëpushim, por paralajmëron se do të reagojë “me forcë” ndaj çdo shkeljeje të saj nga ana e Iranit.

“Ne kemi arritur objektivin tonë strategjik për të eliminuar kërcënimin bërthamor dhe balistik të regjimit iranian,” – thuhet në deklaratë. Po ashtu, qeveria izraelite falënderon Presidentin Donald Trump për “mbështetjen në mbrojtje dhe pjesëmarrjen aktive në arritjen e kësaj marrëveshjeje historike.”

Kryeministri Netanjahu pritet të mbajë një deklaratë publike më vonë gjatë ditës, ku pritet të japë më shumë detaje mbi marrëveshjen dhe hapat e ardhshëm.

Sipas deklaratës, “IDF arriti kontroll të plotë ajror mbi qiellin e Teheranit, shkaktoi dëme të rënda në udhëheqjen ushtarake dhe shkatërroi dhjetëra objektiva qendrore të qeverisë iraniane”.

Deklarata gjithashtu njofton për herë të parë se një tjetër shkencëtar i lartë bërthamor u vra.

“Edhe gjatë ditës së kaluar, IDF-ja i dha goditje të mëdha objektivave të regjimit në zemër të Teheranit, eliminoi qindra operativë të Basij, aparatin shtypës të regjimit dhe vrau një tjetër shkencëtar të lartë bërthamor”, thuhet në deklaratë.

“Izraeli falënderon Presidentin Trump dhe Shtetet e Bashkuara për mbështetjen e tyre në mbrojtje dhe pjesëmarrjen e tyre në eliminimin e kërcënimit bërthamor iranian”, thuhet në deklaratë.

Presidenti i SHBA-së Donald Trump kishte thënë më parë se një armëpushim do të hynte në fuqi, menjëherë pasi të paktën katër persona u vranë kur një raketë balistike iraniane goditi një ndërtesë banimi në Beersheba.