Izraeli bombardon konsullatën iraniane në Siri, vritet komandanti i lartë i Gardës Revolucionare të Iranit
Një komandant i lartë i Gardës Revolucionare të Iranit është vrarë në një sulm ajror në ndërtesën e konsullatës së vendit në Damask, Siri.
Sipas CNN, komandanti i Forcave iraniane Quds, Mohammed Reza Zahedi ishte në mesin e njerëzve të vrarë në sulm. Ambasadori iranian Hossein Akbari pretendoi se ndërtesa ishte shënjestruar nga raketat izraelite.
“Në sulm u vranë ndërmjet pesë dhe shtatë persona. Unë isha në zyrën time në ambasadë në atë kohë dhe vetë isha dëshmitar i shkatërrimit”, tha Akbari.
Media shtetërore siriane gjithashtu raportoi se “një akt agresioni izraelit shënjestroi të hënën pasdite një ndërtesë në lagjen Mezzeh në Damask”.
Sulmi shkaktoi “shkatërrim masiv” në ndërtesë si dhe dëmtime në ndërtesat fqinje.