IAEA ngre alarmin pas sulmeve në Iran: Rrezik real radiologjik, kërkohet takim urgjent me Teheranin

Përballë shqetësimeve serioze për rrezatim radiologjik pas sulmeve ajrore amerikane mbi centralet bërthamore në Iran, drejtori i Agjencisë Ndërkombëtare për Energjinë Atomike (IAEA), Rafael Mariano Grossi, ka propozuar një takim urgjent me ministrin e Jashtëm të Iranit, Abbas Araghchi.

Në një deklaratë zyrtare, Grossi konfirmoi se i ka dërguar një letër zyrtare Araghchit, duke theksuar rëndësinë e bashkëpunimit të menjëhershëm ndërkombëtar dhe të kthimit të inspektorëve të agjencisë në objektet e prekura nga bombardimet.

“Inspektorët tanë kanë qëndruar në Iran gjatë gjithë konfliktit dhe janë gati për të filluar punën sa më shpejt të jetë e mundur, për të kryer verifikime të inventarëve të materialeve bërthamore,” tha Grossi.

Ai theksoi rrezikun ekstrem që përbëjnë sulmet ndaj objekteve bërthamore, duke deklaruar:

“Siç e kam thënë vazhdimisht – para dhe gjatë konfliktit – objektet bërthamore nuk duhet të sulmohen kurrë për shkak të rrezikut shumë real të një aksidenti serioz radiologjik.”

Sipas IAEA, disa nga impiantet më të ndjeshme iraniane kanë pësuar dëme të konsiderueshme, përfshirë qendrat e konvertimit dhe pasurimit të uraniumit. Vlerësimi paraprak i agjencisë tregon për çlirime lokale të substancave radioaktive dhe kimike brenda ambienteve të impianteve, të cilat përmbanin uranium të pasuruar në nivele të ndryshme.

Megjithatë, Grossi sqaroi se deri më tani nuk ka pasur raportime për rritje të niveleve të rrezatimit jashtë objekteve të prekura. Kjo ka shmangur për momentin një emergjencë më të gjerë mjedisore, por IAEA kërkon që të nisë menjëherë hetimet dhe vlerësimet në terren.