I dënuar për vrasje në Itali, arrestohet 45-vjeçari në Vlorë! Do ekstradohet në vendin fqinj
Policia e Vlorës ka arrestuar Renald Gjinin, 45 vjeç, i shpallur në kërkim ndërkombëtar nga autoritetet italiane. Gjini ishte dënuar me 12 vite e 10 muaj burgim nga Gjykata e Apelit në Bolonja për veprat penale “Vrasje” dhe “Mbajtja pa leje e armëve”.
Operacioni i koduar “Il Obiettivo” u zhvillua nga Sektori për Hetimin e Krimeve të Rënda në bashkëpunim me Seksionin Operacional të DVP Vlorë dhe zyrat e Interpolit, duke çuar në kapjen dhe arrestimin e tij në lagjen “Rilindja”.
Gjini do të ekstradohet në Itali për të vuajtur dënimin e dhënë nga gjykata italiane, ndërsa Interpol Tirana dhe Interpol Roma po koordinohen për finalizimin e procedurave.
Njoftimi i policisë
DVP Vlorë/Finalizohet operacioni policor i koduar “Il Obiettivo”, për kapjen e një shtetasi të shpallur në kërkim ndërkombëtar, për llogari të Italisë.
I dënuar nga autoritetet italiane me 12 vjet e 10 muaj burgim, për veprat penale “Vrasje” dhe “Mbajtja pa leje e armëve”, lokalizohet dhe vihet ne pranga 45-vjeçari, i shpallur në kërkim ndërkombëtar, me qëllim ekstradimi drejt Italisë.
Strukturat e Sektorit për Hetimin e Krimeve të Rënda, në bashkëpunim me Seksionin Operacional në DVP Vlorë, në vijim të punës për lokalizimin dhe kapjen e shtetasve të shpallur në kërkim ndërkombëtar, bazuar në informacionet e siguruara si dhe në bashkëpunim me zyrat homologe të Interpolit, organizuan dhe finalizuan operacionin policor të koduar “Il Obiettivo”.
Si rezultat, ditën e djeshme, në lagjen “Rilindja”, u bë kapja dhe arrestimi provizor, me qëllim ekstradimi drejt Italisë, i shtetasit:
Renald Gjini, 45 vjeç, banues në Vlorë.
Ky shtetas ishte i shpallur në kërkim ndërkombëtar, pasi Gjykata e Apelit Bolonja, Itali, e ka dënuar këtë shtetas me 12 vjet e 10 muaj burg, për veprat penale “Vrasje” dhe “Mbajtja pa leje e armëve”, sipas legjislacionit penal italian.
Interpol Tirana dhe Interpol Roma janë në bashkëpunim të ngushtë për procedurat e mëtejshme të ekstradimit.