Harta e Riskut Elektoral 2025/ Zonat më të nxehta ku ndikojnë grupet kriminale në zgjedhje
Instituti i Studimeve Politike ka publikuar Hartën e Riskut Elektoral, një raport që vlerëson risqet dhe sfidat që mund të ndodhin gjatë zgjedhjeve parlamentare të vitit 2025. Sipas këtij raporti, disa zona të Shqipërisë janë identifikuar si më të rrezikuara për shkak të ndikimeve nga grupe kriminale dhe korrupsioni.
Zonat me riskun më të lartë:
Bashkitë Elbasan dhe Durrës janë ato me koeficientin më të lartë të riskut, me 87%, për shkak të ndërthurjes së korrupsionit të lartë, ndikimit të grupeve kriminale, dhe trafikut të votës. Këtu, lidhjet informale dhe roli i individëve të fuqishëm ekonomikë kanë krijuar një traditë të manipulimit të zgjedhjeve në disa cikle zgjedhore. Po ashtu, bashkitë Dibër, Lezhë, Kurbin, Shkodër dhe Fier janë përfshirë në këtë listë për shkak të ndikimit të grupeve informale dhe kriminale.
Zonat me riskun më të ulët:
Në anën tjetër, zonat si Përmeti, Maliqi, Konispoli dhe Gramshi kanë risk më të ulët elektoral, pasi këto janë zona homogjene, pa prezencë të krimit të organizuar dhe pa individë të fuqishëm politikë apo ekonomikë. Këto zona kanë pasur një histori të qëndrueshmërisë elektorale dhe mungesës së ndikimeve kriminale.
Raporti ka theksuar rëndësinë e monitorimit të këtyre zonave dhe ndërhyrjeve për të siguruar zgjedhje të ndershme dhe pa ndikime të paligjshme.
