Hapet gara për postin e Drejtorit të Sigurisë Publike në Policinë e Shtetit, kriteret për aplikantët

Për herë të parë në historinë e Policisë së Shtetit, posti i Drejtorit të Departamentit të Sigurisë Publike do të përzgjidhet përmes një gare të hapur, duke sjellë një ndryshim të rëndësishëm në mënyrën e emërimit të një prej pozicioneve më të rëndësishme në strukturën e policisë.

Sipas njoftimit zyrtar, afati i fundit për aplikim është 15 korriku 2025. Oficerët e interesuar duhet të plotësojnë një sërë kriteresh të detajuara, ku ndër më kryesoret janë mbajtja e gradës “Drejtues” ose “Drejtues i Parë”, si dhe shtetësia shqiptare.

Kriteret kryesore për aplikantët:

Të jenë mbajtës të gradës “Drejtues” ose “Drejtues i Parë”;

Të kenë shtetësi shqiptare;

Të mos jenë dënuar me vendim të formës së prerë;

Të mos kenë pasur masa për shkelje të rënda disiplinore gjatë 3 viteve të fundit;

Të jenë në kushte të mira shëndetësore për të kryer detyrën;

Të mos kenë konflikt interesi, sipas legjislacionit përkatës.

Pas përfundimit të fazës së aplikimeve, një komision i posaçëm do të verifikojë dokumentacionin e paraqitur, ndërsa faza e dytë do të përfshijë intervistimin dhe pikëzimin e kandidatëve.

Posti aktualisht mbahet nga Rebani Jaupi

Aktualisht, këtë pozicion e mban Rebani Jaupi, një emër i njohur në radhët e Policisë së Shtetit. Nuk është bërë ende e ditur nëse ai do të jetë pjesë e kësaj gare të hapur, ndërsa pritet me interes zhvillimi i mëtejshëm i procesit.

Ky është një hap i konsideruar si ndryshim i madh në drejtim të transparencës dhe profesionalizmit, pasi më herët drejtuesit e lartë në polici janë caktuar me emërim të drejtpërdrejtë.

Ndërkohë, garat për drejtuesit e tjerë të departamenteve në Policinë e Shtetit ende nuk janë shpallur.