Policia ka finalizuar operacionin e koduar “Tentakulat”, duke goditur një grup kriminal që prej vitit 2019 merrej me shpërndarjen dhe trafikimin e drogës nga Shqipëria drejt Kosovës. Gjatë këtij operacioni, janë arrestuar 5 persona, ndërsa 5 të tjerë janë shpallur në kërkim.
Të arrestuarit dhe akuzat ndaj tyre
Në pranga kanë rënë:
• Dritan Uka, 45 vjeç
• Alban Grori alias Alban Gruri, 47 vjeç
• Mehdi Gjoka, 56 vjeç
• Ylber Tahiri alias Ylli Hida, 51 vjeç
• Ramazan Doçi, 30 vjeç
Ndërkohë, personat e shpallur në kërkim janë:
• A. D. alias A. D., 51 vjeç
• A. D., 48 vjeç
• N. G., 35 vjeç
• E. T., 24 vjeç
• I. P., 34 vjeç
Sipas Policisë, ky grup kriminal siguronte lëndë narkotike të llojit Cannabis Sativa nga zona të ndryshme të Krujës dhe Dibrës. Droga më pas shpërndahej në lokale të Tiranës dhe trafikohej në Kosovë.
Hetimi dhe lidhjet me grupe të tjera kriminale
Gjatë hetimeve, ka rezultuar se këta persona ishin në bashkëpunim me një tjetër grup kriminal të goditur nga Policia e Gjirokastrës në nëntor 2024, gjatë operacionit të koduar “Crossborder Line”.
Policia dhe Prokuroria po vijojnë hetimet për të arrestuar personat e shpallur në kërkim dhe për të zbardhur plotësisht veprimtarinë kriminale të grupit.
Materialet janë referuar në Prokurori për veprime të mëtejshme ligjore.