Gjykata e Hagës zgjat paraburgimin e Hashim Thaçit dhe sqaron vizitën e tij në vendlindje
Gjykata e Dhomave të Specializuara në Hagë ka vendosur të zgjatë paraburgimin e Hashim Thaçit, Isni Kilajt, Fadil Fazliut dhe Bashkim Smakajt, lidhur me aktakuzën për pengim të administrimit të drejtësisë. Vendimi u bë i ditur nga zëdhënësja e Dhomave të Specializuara, Angela Griep, në një konferencë për media.
Griep theksoi se në procesin gjyqësor ndaj Thaçit dhe të tjerëve kishte zhvillime të rëndësishme gjatë muajve mars dhe prill, duke përmendur miratimin nga trupi gjykues të kërkesës së Prokurorisë për lejen e dëshmitarëve të dëshmonin përmes video-lidhjes dhe pranimin e disa dëshmive me shkrim. Ajo gjithashtu sqaroi se janë pranuar disa prova materiale të shtatë dëshmitarëve, ndërsa provat pa mbështetje të mjaftueshme janë refuzuar.
Zëdhënësja përmendi gjithashtu vizitën e Hashim Thaçit në vendlindje, e cila u bë për arsye humanitare pas vdekjes së babait të tij. Ajo theksoi se ky vendim u mor me kujdes për të shmangur mundësinë e ndikimit në procesin gjyqësor.
Në lidhje me çështjen e pengimit të administrimit të drejtësisë, më 3 prill, Paneli i Apelit hodhi poshtë tri nga katër pikat e apelit të Prokurorisë, por miratoi pikën e katërt, duke vlerësuar se forma e tretë e nxitjes sipas Kodit Penal të Kosovës është e aplikueshme, çështje që është kthyer për rivlerësim të mundshëm të një akuze shtesë.