Replika Lajme
Related Articles
Zgjedhjet e 60-ta presidenciale të SHBA-së do të vendosin presidentin e 47-të – që konsiderohet gjerësisht si njeriu më i fuqishëm në botë dhe zëvendëspresidentin e 50-të. Kandidatët dhe mbështetësit e tyre po i përshkruajnë zgjedhjet e 5 nëntorit si më të rëndësishmet e jetës së tyre, me demokracinë dhe mënyrën e jetesës amerikane në rrezik.Shuma rekord parash janë mbledhur dhe shpenzuar për reklama të fushatës dhe takime në terren. Mbulimi mediatik në shtyp, në TV, në internet dhe në podkaste nuk ka qenë kurrë më intensiv – apo më i polarizuar.
Amerikanët kanë nisur tashmë të votojnë për të zgjedhur se kush do të drejtojë Shtëpinë e Bardhë në katër vitet e ardhshme. Gara mes Nënpresidentes Kamala Harris dhe ish-Presidentit Donald Trump është tepër e ngushtë. Janë mbi 244 milionë qytetarë me të drejtë vote ndërsa mbi 78 milionë votues kanë hedhur vota të parakohshme. Në zgjedhje janë 34 nga 100 vendet në Senat. Do të zhvillohen 13 guvernata shtetërore dhe territoriale dhe shumë zgjedhje të tjera shtetërore dhe lokale. Votuesit në 41 shtete do të marrin në konsideratë gjithsej 159 nisma të fletëvotimeve. Dhjetë shtete, përfshirë Arizonën, Koloradon dhe Floridën, kanë masa të lidhura me abortin në fletëvotim.
Florida, Dakota e Veriut dhe Dakota e Jugut po shqyrtojnë nëse do të legalizojnë marijuanën. Nuk ka më kuptim të flasim vetëm për “ditën e zgjedhjeve”. Dhjetëra miliona njerëz kanë votuar herët me postë ose personalisht, duke shmangur kështu radhët e gjata, motin e mundshëm të keq ose shqetësime të tjera. Dita e parë e votimit të parakohshëm të Xhorxhias vendosi rekord, sipas zyrtarëve shtetërorë, ndërsa më shumë se 97,000 votuan ditën e parë në Wisconsin. Demokratët inkurajuan njerëzit të votojnë me postë në 2020 për të shmangur ekspozimin ndaj Covid-19 gjatë pandemisë dhe bënë beteja ligjore për të zgjeruar votimin në mungesë. Trump, në të kundërt, pretendoi se praktika ishte e mbushur me mashtrime, megjithëse republikanët që atëherë kanë ndryshuar mesazhet e tyre dhe e kanë përqafuar gjithnjë e më shumë votimin me postë. Me përjashtim të Alabama, Mississippi dhe New Hampshire, të gjitha shtetet u japin votuesve mundësinë të hedhin një votim personalisht në një vendvotim përpara ditës së zgjedhjeve, sipas Konferencës Kombëtare të Legjislaturës Shtetërore.
Shumica e shteteve fillojnë numërimin e atyre fletëvotimeve në ditën e zgjedhjeve dhe disa kërkojnë që zyrtarët të presin derisa të mbyllen qendrat e votimit për të filluar numërimin. Disa shtete ofrojnë një version të votimit të hershëm të quajtur votim “në mungesë personalisht”, në të cilin një votues mund të marrë dhe të dorëzojë një fletëvotim në mungesë personalisht në një vendvotim përpara ditës së zgjedhjeve. Shumica e shteteve ofrojnë një formë të votimit në mungesë, në të cilën një votues kërkon një fletëvotim paraprakisht dhe e kthen atë me postë.
Disa u ofrojnë votuesve mundësinë e kthimit të fletëve të votimit në mungesë në një kuti të sigurt. Tetë shtete praktikojnë zgjedhje “me postë” në të cilat të gjithë votuesit e regjistruar marrin një fletëvotim me postë, pavarësisht nëse planifikojnë ta përdorin atë. Shumica e shteteve i lejojnë zyrtarët të përpunojnë menjëherë fletëvotimet në mungesë, por disa u kërkojnë atyre të presin deri në ditën e zgjedhjeve për të filluar përpunimin e fletëvotimeve – gjë që mund të ngadalësojë publikimin e rezultateve të zgjedhjeve. Në ditën e zgjedhjeve, që është 5 nëntori i këtij viti, të gjithë të tjerët shkojnë në qendrat e votimit për të votuar. Pasi numërohen fletëvotimet, rezultatet fillojnë të publikohen
Sondazhet më të fundit tregojnë se gara mes Donald Trump dhe Kamala Harris është e ngushtë aq sa është tepër e vështirë të thuhet se kush është më përpara veçanërisht kur merret parasysh një diferencë gabimi prej rreth tre deri në katër pikë përqindjeje. Nga të dhënat e fundit rezulton se ish-presidenti Donald Trump ka epërsi të vogël në Nevada, Xhorxhia , Karolinën e Veriut dhe Arizona ndërsa Kamala Harris në Wisconsin dhe Michigan. Ndërkohë gara është e ngushtë në shtetin e Pensilvanisë.
