Futet nga Porti i Durrësit një sasi mishi pule me Salmonelë, AKU nis gjurmimin për bllokimin e produktit
Autoriteti Kombëtar i Ushqimit (AKU) ka nisur procedurat e gjurmimit dhe bllokimit të një sasie mishi pule të importuar nga Brazili, e dyshuar për prani të bakterit Salmonella Typhimurium. Produkti ka hyrë në Shqipëri përmes Portit të Durrësit dhe është shpërndarë në disa pika tregtimi.
Pas analizave laboratorike të kryera më 21 mars 2025 nga Instituti i Sigurisë Ushqimore dhe Veterinare (ISUV), u konfirmua prania e salmonelës në një mostër fileto pule të ngrirë. Si rezultat, AKU ka marrë masa të menjëhershme për të gjurmuar dhe ndaluar përhapjen e këtij produkti në treg.
Subjekti importues është inspektuar dhe referuar në Prokurorinë e Rrethit Gjyqësor Tiranë për hetime të mëtejshme mbi mosrespektimin e kritereve të gjurmueshmërisë dhe dhënien e informacionit të pasaktë.
AKU siguron publikun se po ndjek nga afër situatën dhe do të marrë të gjitha masat e nevojshme për mbrojtjen e shëndetit të konsumatorëve. Për çdo zhvillim të mëtejshëm, institucionet përgjegjëse do të informojnë qytetarët.