Beogradi është përfshirë nga një protestë masive antiqeveritare, ku dhjetëra mijëra qytetarë janë mbledhur për të kundërshtuar korrupsionin dhe qeverisjen e Aleksandar Vuçiç. Kulmi i demonstratave ka parë pjesëmarrjen e një numri të madh studentësh dhe qytetarësh, ndërsa parku Pionirski, përballë Kuvendit të Serbisë, është mbushur me traktorë dhe forca të shumta policore.
Pamjet nga mediat vendase tregojnë traktorët e parkuar në zonë, disa prej të cilëve kanë pësuar dëmtime, me goma të shpuara dhe xhama të thyer. Autorët e këtyre akteve mbeten ende të panjohur.
Presidenti Vuçiç ka deklaruar se shteti do të marrë të gjitha masat për të ruajtur rendin dhe ka paralajmëruar arrestimin e personave që shkaktojnë incidente. Ndërkohë, qeveria ka akuzuar opozitën për organizimin e dhunës, por studentët kanë mohuar çdo përfshirje në veprime të tilla.
Kjo protestë konsiderohet si pika kulmore e një lëvizjeje të gjatë antiqeveritare që ka përfshirë Serbinë në muajt e fundit.
