Fituan 500,000 euro me kartë të vjedhur, hajdutëve në Francë iu kërkohet të ndajnë fitimin me viktimën
Një ngjarje e pazakontë ka ndodhur në Tuluzë, Francë, ku dy hajdutë përfunduan duke fituar një çmim prej 500,000 eurosh në lotari, por me një biletë të blerë përmes një karte të vjedhur.
Viktima, Jean-David E., e kishte kartën e tij të kreditit në një çantë që iu vodh muajin e kaluar. Hajdutët e përdorën kartën për të bërë blerje me një vlerë totale prej 52.50 euro, ku përfshihej edhe bileta fatlume e lotarisë. Megjithëse viktima e bllokoi kartën pasi zbuloi vjedhjen, ishte tepër vonë.
Sipas mediave lokale, hajdutët janë dy persona të pastrehë që ende nuk kanë tërhequr shumën fituese. Ndërkohë, operatori i lotarisë La Française des Jeux ka ngrirë përkohësisht biletën fituese, ndërsa policia vazhdon hetimet.
Avokati i viktimës, Pierre Debuisson, ka deklaruar se Jean-David është i gatshëm të tërheqë ankesën nëse fituesit pranojnë të ndajnë shumën. “Nuk rrezikoni asgjë. Le ta ndajmë fitimin dhe të ndryshojmë jetët tona,” tha ai.
Megjithatë, ekziston rreziku që biletës t’i shpallet pavlefshmëria, pasi është blerë me një kartë të vjedhur. Jean-David shpreson që të arrihet një marrëveshje, por koha është e kufizuar, pasi biletat fituese skadojnë 30 ditë pas blerjes.
“Pa paratë e klientit tim, ata nuk do të kishin fituar, por pa ata, as klienti im nuk do të kishte fituar. Logjikisht, fitimi duhet të ndahet,” përfundoi Debuisson.