(EMRAT) Skandal në Greqi – vajza falsifikoi mesazhet, babai vrau dajën: Erjon Pelivani viktimë e pafajshme, gjykata zbulon të vërtetën tronditëse

Një ngjarje tronditëse me pasoja fatale është zbardhur në Greqi, ku një 19-vjeçare pranoi në gjykatë se kishte falsifikuar mesazhe telefonike për të bindur të atin që të vriste dajën e saj, duke e paraqitur këtë të fundit si përdhunuesin e saj. Viktima e këtij krimi të rëndë është shqiptari Erjon Pelivani, 33 vjeç, i cili humbi jetën më 9 janar 2024 pranë një fabrike çimentoje në Volos.

Në qendër të ngjarjes ndodhet shtetasi shqiptar Fatmir Tarellari, 51 vjeç, nga Poliçani, i cili ndodhet aktualisht në gjykim për akuzat “vrasje me dashje në gjendje të qetë mendore”, “armëmbajtje pa leje” dhe “përdorim arme”.

Sipas hetimeve dhe dëshmive të dhëna në Gjykatën me Juri të Përzier të Larisës, Tarellari është shtyrë drejt këtij akti ekstrem nga vajza e tij, e cila i kishte thënë se ishte përdhunuar nga daja – viktima Erjon Pelivani. Për ta bindur, ajo i kishte treguar mesazhe të manipuluara në telefon, të krijuara nga biseda me të dashurin e saj, duke i bërë të dukeshin si të dërguara nga 33-vjeçari.

Erjon Pelivani

Kjo çoi babanë në një gjendje të rënduar emocionale. Ai i ngriti kurth Pelivanit dhe e qëlloi me pushkë gjahu, duke e lënë të vdekur në vend.

Ndërkohë, hetimi i Policisë Helenike dhe analizat forenzike zbuluan se mesazhet ishin të falsifikuara dhe se Pelivani nuk kishte asnjë lidhje me akuzat e vajzës. Kjo e fundit, gjatë një dëshmie të fundit, pranoi të vërtetën e tmerrshme: kishte trilluar gjithçka dhe i kishte sajuar mesazhet për të fshehur marrëdhënien me të dashurin dhe për të justifikuar mospagimin e qirasë.

Fatmir Tarellari

“Më vjen shumë keq për atë që ndodhi”, tha Tarellari gjatë seancës gjyqësore, duke shtuar: “Ishte periudha më e keqe e jetës sime kur besova se vajza ime ishte abuzuar”.

Procesi gjyqësor do të vazhdojë me dëshmitë e mëtejshme, ndërsa drejtësia po përpiqet të japë përgjigje për një krim që tronditi opinionin publik dhe shkatërroi një familje për shkak të një gënjeshtre tragjike.

Fjalë kyçe: Greqi, vrasje, mesazhe të falsifikuara, Fatmir Tarellari, Erjon Pelivani, përdhunim i rremë, SMS, gjyq, dëshmi, vajzë 19-vjeçare, krim familjar, ngjarje tragjike, Volos, Larisa.