Një person i armatosur vrau me armë zjarri ish-deputeten e parlamentit të Ukrainës, e njohur për fushatat për promovimin e gjuhës së vendit të saj.
Iryna Farion, 60 vjeçe, u qëllua në kokë në një rrugë në qytetin perëndimor të Lviv. Ajo vdiq pasi u transportua në një spital, tha Guvernatori rajonal i Lviv Maksym Kozytskiy.
Natalya Matolinets, drejtuese e shërbimit të anesteziologjisë në Shoqatën e Parë Mjekësore të Lviv, tha se Farion mbërriti në spital në gjendje kritike “me një plagë të rëndë me armë zjarri në tru”.
Ajo u operua menjëherë dhe më pas u transferua në njësinë e kujdesit intensiv për trajtim të vazhdueshëm, por zemra nuk mundi të përballonte goditjen.
“Fatkeqësisht, me gjithë përpjekjet e mjekëve, pavarësisht të gjitha masave të ringjalljes, jeta e Iryna Farionit nuk mund të shpëtohej”, tha Matolinets.
Ministri i Brendshëm Ihor Klymenko deklaroi se të shtënat po trajtoheshin si një atentat në tentativë. Policia ka nisur një kërkim të gjerë për autorin e armatosur.
Presidenti Volodymyr Zelenskiy u shpreh se po merrte raporte të rregullta mbi përpjekjet për kapjen e të armatosurit. Ai shtoi se çdo akt dhune duhet të dënohet.
Farion, një gjuhëtare, u bë anëtare e partisë nacionaliste Svoboda (Liria) në 2005 dhe u zgjodh në parlament në 2012, por dështoi në përpjekjet e mëvonshme për të fituar rizgjedhjen.
Ajo fitoi famë për fushatat e shpeshta për të promovuar gjuhën ukrainase dhe për të diskredituar zyrtarët publikë që flisnin rusisht.