E Ngarkuara me Punë e SHBA takohet me Kryepeshkopin Joan Pelushi: Diskutuan për harmoninë ndërfetare në Shqipëri
E Ngarkuara me Punë e SHBA-së në Tiranë, Nancy VanHorn, është takuar sot me Kryepeshkopin e sapo fronëzuar të Tiranës, Durrësit dhe gjithë Shqipërisë, Joan Pelushi, për t’i përcjellë atij urimet për rolin e ri si udhëheqës i Komunitetit Ortodoks të Shqipërisë.
Në njoftimin zyrtar, Ambasada Amerikane në Tiranë bën me dije se gjatë këtij takimi, VanHorn dhe Kryepeshkopi Pelushi diskutuan mbi rolin jetik të komuniteteve fetare në vend dhe rëndësinë e vazhdimit të harmonisë ndërfetare në Shqipëri.
“E Ngarkuara me Punë e SHBA-së në Tiranë, Nancy VanHorn, u takua sot me Kryepeshkopin e sapo fronëzuar të Tiranës, Durrësit dhe gjithë Shqipërisë, Joan Pelushi, për t’i përcjellë urimet për rolin e ri si udhëheqës i Komunitetit Ortodoks të Shqipërisë. Gjatë takimit, ata diskutuan mbi rolin jetik të komuniteteve fetare dhe rëndësinë e vazhdimit të historisë së pasur të harmonisë ndërfetare në Shqipëri,” thuhet në njoftimin e Ambasadës Amerikane.
Ky takim vjen pas fronëzimit të Joan Pelushit si Kryepeshkop i Kishës Ortodokse Autoqefale të Shqipërisë, pas largimit të Kryepeshkopit Anastas Janullatos.