Dua Lipa përjeton momente paniku! Fansat i futen fshehurazi në hotel në Kili
Dua Lipa ka përjetuar momente të vështira gjatë qëndrimit në hotelin Ritz-Carlton në Santiago, Kili, kur disa fansa arritën të futen fshehurazi në katin ku ajo qëndronte dhe madje prisnin jashtë dhomës së saj.
Sipas burimeve të “The Sun”, situata u bë shqetësuese kur fansat fituan akses në zonën private të hotelit. “Një grup fansash u gjendën jashtë dhomës së saj, ndërsa të tjerë prisnin në ashensor,” raportoi burimi, duke shtuar se siguria ndërhyri për të larguar të pranishmit dhe për të bërë një spastrim shtesë. Për këtë arsye, këngëtarja shqiptare refuzoi të bëjë fotografi brenda hotelit.
Dua ndodhej në Kili për të xhiruar një reklamë dhe pritet të rikthehet në skenë në mars me pjesën e dytë të turneut të saj për albumin “Radical Optimism”.
Ndërkohë, jeta e saj personale duket po aq e lumtur sa dhe karriera. Pak javë më parë, mediat raportuan për fejesën e saj me aktorin Callum Turner, 34 vjeç. “Callum është një mbështetje e madhe për Duan dhe ata janë një çift i mrekullueshëm,” tha një burim i afërt, duke shtuar se familja dhe miqtë e tyre janë shumë të lumtur për këtë hap.
Viti 2024 po rezulton të jetë një vit i suksesshëm për Duan, e cila vazhdon të shkëlqejë si në aspektin profesional ashtu edhe në atë personal.