Dosja “Black Eagle” në Belgjikë/ Prokuroria kërkon 20 vite burg për Alfredo Hamzai dhe Indrit Kulaj
Prokuroria e Belgjikës ka kërkuar 20 vite burg për dy shqiptarët Alfredo Hamzai dhe Indrit Kulaj, të cilët konsiderohen si drejtuesit kryesorë të organizatës kriminale të njohur si “Black Eagle” (Shqiponja e zezë). Kërkesa u bë gjatë seancës në Gjykatën e Apelit të Brukselit të martën, në kuadër të një operacioni të gjerë kundër trafikut të drogës.
Në këtë çështje janë përfshirë gjithsej 34 persona të akuzuar për përkatësi në një organizatë kriminale që dyshohet se ka trafikuar tonelata kokainë nga Amerika Latine drejt Evropës në periudhën 2018-2022.
Fillimisht, Hamzai dhe Kulaj u dënuan me nga 9 vite burg në qershor 2024, por prokuroria e cilësoi këtë dënim të pamjaftueshëm. “Po flasim për tonelata dhe tonelata droge. Si mund të kalojë mesazhi nëse nuk themi ndaloni tani? Ne kemi nevojë për një përgjigje të fortë dhe të ashpër,” argumentoi prokurori, duke kërkuar masa më të rënda ndëshkuese.
Sipas hetimeve, Alfredo Hamzai kishte kontakte me grupe mafioze italiane të krijuara në Limburg, si dhe me një organizatë tjetër kriminale më të madhe me bazë në Majorka. Ndërsa Indrit Kulaj u arrestua në janar 2020 në Spanjë, duke transportuar 440 kilogramë kokainë.
Tashmë, vendimi i Gjykatës së Apelit të Brukselit do të përcaktojë nëse kërkesa e prokurorisë për dënim më të ashpër do të pranohet.