Donald Trump shfaq dyshime për paqen mes Rusisë dhe Ukrainës: Ka shumë urrejtje, ndoshta asgjë nuk do të funksionojë
Presidenti i SHBA-së, Donald Trump, ka shprehur pesimizëm për mundësinë e një marrëveshjeje përfundimtare paqeje midis Ukrainës dhe Rusisë, duke nënvizuar se tensionet e thella historike dhe ndjenjat e urrejtjes e bëjnë situatën tejet të ndërlikuar.
Në një intervistë për emisionin “Meet the Press” të NBC News, Trump tha:
“Ndoshta asgjë nuk do të funksionojë, ndoshta është thjesht e pamundur. Duhet ta kuptoni se ka një urrejtje të madhe këtu mes Ukrainës dhe Rusisë.”
Duke komentuar qasjen e tij në këtë konflikt, Trump shtoi me ironi dhe vendosmëri:
“Do të vijë një kohë kur unë do të them: Në rregull, vazhdo, vazhdo të jesh budalla. Ndonjëherë i afrohem dhe pastaj ndodh diçka pozitive.”
Ai nuk akuzoi hapur asnjërën palë, por theksoi kompleksitetin emocional dhe politik të krizës që ka kapluar rajonin që nga viti 2022.
Lidhur me një marrëveshje të fundit për mineralet, të nënshkruar mes Kievit dhe Uashingtonit, Trump deklaroi se marrëveshja përfaqëson një përfitim të qartë për SHBA-të, pa bërë të qartë nëse mbështet ndonjërën palë në mënyrë të drejtpërdrejtë.
“Mendoj se jemi afruar më shumë me njërën palë, megjithëse ndoshta jo aq shumë me tjetrën. Do ta shohim. Nuk dua të specifikoj se me cilën palë jemi më afër tani. Por kemi arritur një marrëveshje që është e dobishme për amerikanët,” theksoi Trump.