Një ngjarje shqetësuese ka tronditur zonën e Akratës në Greqi, ku një 50-vjeçar shqiptar është arratisur nga spitali psikiatrik, duke shkaktuar alarm te autoritetet.
I arrestuari akuzohej për dhunë në familje, pasi kishte kërcënuar bashkëshorten e tij 45-vjeçare. Sipas mediave greke, gruaja e tij kishte telefonuar policinë për ta denoncuar, duke deklaruar se burri i saj e kishte kërcënuar me fjalët: “Do të hidhem nga çatia!”
Pas ndërhyrjes së menjëhershme të policisë, 50-vjeçari u arrestua dhe u dërgua në klinikën psikiatrike të Spitalit Universitar të Patrës. Megjithatë, ai ka arritur të arratiset nga klinika, duke vënë në alarm autoritetet greke që tashmë janë në kërkim të tij.
Policia ka vendosur postblloqe në zonën ku ndodhet shtëpia e familjes, ndërsa gruaja dhe fëmijët e tij janë strehuar në komisariat për të garantuar sigurinë e tyre.
Hetimet për kapjen e 50-vjeçarit vijojnë, ndërkohë që autoritetet kanë rritur kontrollet për të shmangur ndonjë incident të mundshëm.