Një ditë pas ngritjes së aktakuzës për vrasjen e Liridona Ademajt, vëllai i saj, Leonard Ademaj, ka bërë thirrje për dënimin maksimal të të akuzuarve, duke kërkuar një dënim të përjetshëm për Naim Murselin dhe dy të tjerë. Në një intervistë ekskluzive për gazetaren Sidorela Gjoni në programin “Shqipëria Live”, Leonard shprehu shqetësimin dhe dhimbjen për humbjen e motrës, duke kërkuar drejtësi dhe ndëshkim për autorët e krimit.
Ai foli gjithashtu për gjendjen e dy fëmijëve të Liridona Ademajt, të cilët ndodhen aktualisht në Suedi nën kujdesin e shërbimit social. Leonard tregoi për bisedën e parë që zhvilloi pas ngjarjes me nipin e tij, i cili ishte i pranishëm gjatë momentit të krimit. Sipas tij, djali i vogël i kishte treguar se ata kishin rënë pre e një grabitjeje dhe se kishte pasur para në dorë, por nuk ia kishte dorëzuar hajdutëve.
“Ishte një aktakuzë e ngritur nga ana e Prokurorisë, ne duam që gjykata të marrë masat e duhura dhe dënimi të jetë kapital. Ne akoma nuk e kemi në dorë dosjen e prokurorisë, pasi ta shohim mund të flasim më gjerësisht për këtë çështje. Aktakuzën e kemi parë vetëm në sipërfaqe, e kemi pritur, por nuk e kemi parë në detaje,” tha ai.
Leonard theksoi se si familje ata kërkojnë dënim të përjetshëm për autorët e krimit dhe se kjo do të ishte një ngushëllim i vogël për dhimbjen që po kalojnë. Sipas tij, gjithë ngjarja duket të ketë qenë një plan i mirëmenduar dhe i organizuar, ku të gjithë përfshirët kishin ditur mirë se çfarë do të bënin.
Në lidhje me marrëdhënien e tij me familjen e Naim Murselit, ai theksoi se nuk kishin asnjë marrëdhënie dhe se asnjëherë nuk ishin përballur me probleme financiare apo familjare që mund të kenë çuar në ngjarjen tragjike. Ai gjithashtu sqaroi se fëmijët e Liridona, për të cilët u kujdes shteti social në Suedi, kanë një gjendje të mirë shëndetësore, por janë shumë të tronditur dhe të dëshpëruar për humbjen e nënës së tyre.
“Fëmijët po kujdesen nga shteti social në Suedi, dhe duhet t’i falënderoj. Gjendja e tyre shëndetësore është e mirë, por jo psikologjike. Ata e kërkojnë çdo ditë nënën dhe kjo na brengos më shumë,” tha ai, duke shtuar se ata janë të tronditur që nga momenti i ngjarjes.
Në fund, Leonard rrëfeu një bisedë të shkurtër me nipin e tij, i cili i tha se ata kishin rënë pre e një grabitjeje dhe se kishte pasur disa para, të cilat ai i kishte mbajtur dhe nuk ia dha grabitësve. Kjo ka qenë një moment i vështirë për të, pasi ai mund të ndihmonte vetëm në distancë, ndërkohë që po kalonin një periudhë të rëndë të jetës së tyre.
Për Leonardin dhe familjen e tij, drejtësia është e vetmja gjë që mund të sjellë një lehtësim të vogël, dhe ata shpresojnë që autorët e vrasjes së Liridona Ademajt të ndëshkohen siç meriton.