Berisha u bën thirrje të rinjve të përdorin VPN për TikTok, Rama kundër: Mos e bëni, është e rrezikshme!

Kryetari i PD-së, Sali Berisha, u ka bërë thirrje të rinjve që të përdorin VPN për të aksesuar TikTok, pas ndalimit të platformës në rrjetet publike dhe institucionet arsimore. Por kryeministri Edi Rama ka dalë kundër kësaj thirrjeje, duke paralajmëruar se përdorimi i VPN-ve mund të ekspozojë të dhënat personale ndaj hakerave.

“Më vjen mirë që TikTok është mbyllur dhe nxënësve u kemi siguruar një mbrojtje nga një influencë shumë negative që i qëndronte mbi kokë 24 në 24. Përsëris për të gjithë dhe mirë është që mësuesit tua thonë prindërve dhe nxënësve që përpjekja për të instaluar TikTok duke përdorur VPN të lira është shumë e rrezikshme, sepse ato e bëjnë telefonin plotësisht të grabitshëm me të gjitha të dhënat që ka brenda,” deklaroi Rama nga shkolla “Besnik Sykja” në Tiranë.

Ai bëri të ditur se qeveria është në dialog me kompaninë TikTok, duke kërkuar vendosjen e më shumë filtrave për të mbrojtur fëmijët nga përmbajtjet e dëmshme.

“Ne kemi hyrë në një dialog me kompaninë përmes AKSH-it dhe Ministrisë së Arsimit dhe kemi kërkuar nga kompania që, nëse do të ketë akses në Shqipëri, duhet të na paraqesë një propozim të besueshëm dhe bindës për një numër të caktuar filtrash për fëmijët tanë dhe një program specifik për të stimuluar mësimin, shkencën, matematikën etj. Ndërkohë që duhet të na garantojë që fëmijët janë të mbrojtur nga pjesët e rrezikshme. Kompania e ka marrë seriozisht dhe na ka premtuar se do ta paraqesë këtë propozim,” tha Rama.

Ai shtoi se, sapo të kenë një përgjigje nga TikTok, do të ndajnë informacionin me mësuesit dhe prindërit.