Bashkimi Evropian në Shqipëri ka nisur zyrtarisht projektin EU Integration Support (EUIS), një program mbështetës prej 7.2 milionë eurosh, që synon të ndihmojë qeverinë shqiptare në përshpejtimin e procesit të negociatave për anëtarësim në BE. Ky projekt është në përputhje me Planin Kombëtar për Integrimin Evropian, i cili synon përmbylljen e negociatave deri në vitin 2027.
Çfarë ofron ky projekt?
Projekti do të ofrojë mbështetje të drejtpërdrejtë për strukturat negociuese dhe institucionet e përfshira në procesin e anëtarësimit. Përmes ekspertizës nga specialistë vendas dhe ndërkombëtarë, BE-ja do të ndihmojë në harmonizimin e legjislacionit shqiptar me atë të BE-së për 35 kapitujt e negociatave, duke forcuar kapacitetet e administratës publike dhe duke e përgatitur atë për përgjegjësitë që sjell anëtarësimi.
Gjithashtu, qeveria shqiptare do të përfitojë nga trajnime strategjike dhe ekspertizë për zbatimin e Planit të Rritjes dhe Agjendës së Reformave.
Ambasadori i BE-së në Shqipëri, Silvio Gonzato, theksoi rëndësinë e këtij momenti:
“Perspektiva evropiane për Shqipërinë nuk ka qenë kurrë më reale. Puna për reformat duhet të përshpejtohet. BE-ja është e gatshme të mbështesë planet ambicioze të Shqipërisë për përmbylljen e procesit të negociatave dhe për përgatitjen për anëtarësim të plotë.”
Ministrja e Shtetit dhe Kryenegociatorja, Majlinda Dhuka, u shpreh se Shqipëria është në rrugën e duhur drejt anëtarësimit:
“Shqipëria ka bërë hapa të rëndësishëm në integrimin evropian. Me mbështetjen e BE-së, synojmë të përmbyllim të gjitha reformat kryesore deri në vitin 2027 dhe të bëhemi anëtarë të Bashkimit Evropian brenda kësaj dekade.”
Plani që sjell 1 miliard euro për Shqipërinë
Një tjetër objektiv i rëndësishëm është Plani i Rritjes, që parashikon 1 miliard euro grante dhe investime në infrastrukturë, modernizimin e ekonomisë, dixhitalizimin dhe forcimin e sundimit të ligjit. Kjo do të ndihmojë Shqipërinë të zvogëlojë hendekun socio-ekonomik me vendet e BE-së dhe të integrohet në tregun unik evropian.
97% e shqiptarëve mbështesin anëtarësimin në BE, por studimet tregojnë se njohuritë mbi procesin e anëtarësimit janë ende të ulëta. Projekti EUIS do të ndihmojë në rritjen e ndërgjegjësimit publik për përfitimet që sjell anëtarësimi në BE, përmes aktiviteteve informuese dhe komunikimit të hapur me qytetarët.