“Bajrami i Trishtuar” në Gaza! Palestinezët festojnë mes bombardimeve izraelite dhe mungesës së ushqimit
Pavarësisht festës së Bajramit, palestinezët në Rripin e Gazës nuk kishin shumë për të festuar, pasi ata përballeshin me një mungesë të madhe ushqimi dhe një vazhdimësi të bombardimeve izraelite. Mijëra palestinezë morën pjesë në lutjet e jashtme në xhami të shkatërruara, ku të paktën 20 palestinezë, shumica gra dhe fëmijë, humbën jetën të dielën.
Adel al-Shaer, një banor nga qyteti i Deir el-Balah, e përshkroi këtë si “Eidin e Trishtuar”, duke thënë: “Kemi humbur të dashurit tanë, fëmijët, jetët tona dhe të ardhmen tonë. Humbëm studentët, shkollat dhe institucionet tona. Humbëm gjithçka.”
Për të tretën javë me radhë, Izraeli ka vazhduar fushatën intensive të bombardimeve dhe operacionet tokësore, duke vrarë qindra civilë palestinezë dhe duke bllokuar hyrjen e ndihmave humanitare, ushqimit dhe karburantit.
Përpjekjet për një armëpushim të ri janë në zhvillim, me ndërmjetësimin e vendeve arabe, por për momentin nuk ka asnjë zgjidhje të dukshme. Sipas Ministrisë së Shëndetësisë së Gazës, më shumë se 50,000 palestinezë janë vrarë deri tani.
