Babai i Elon Musk lavdëron Putinin në Moskë dhe fajëson të birin për përplasjen me Trumpin
Errol Musk, babai i Elon Musk, ka marrë pjesë në një forum të pazakontë në Moskë, ku ka lavdëruar vlerat tradicionale ruse dhe presidentin Vladimir Putin, ndërsa ka kritikuar Perëndimin për “konfuzion moral”. Në këtë aktivitet të mbajtur më 10 qershor, të quajtur “Forumi i së Ardhmes 2050”, Musk foli përpara një audience të zgjedhur, ku mes të tjerash, komentoi edhe përplasjen e të birit me presidentin Donald Trump, duke e justifikuar atë me “stres dhe lodhje”.
Forumi ishte organizuar dhe financuar nga manjati konservator rus Konstantin Malofeev dhe ideologu ultranacionalist Alexander Dugin, të dy të njohur për lidhjet e ngushta me Kremlinin dhe të sanksionuar nga Perëndimi. Mes të ftuarve ishin edhe teoricieni amerikan i konspiracionit Alex Jones dhe figura politike britanike George Galloway.
Në fjalimin e tij, Errol Musk foli edhe për përpjekjet e hershme të Elon për të blerë raketa nga Rusia, duke thënë me humor se rusët “menduan se po bënte shaka” kur ai kërkoi të blinte një raketë, gjë që sipas tij çoi në krijimin e SpaceX.