Arrestohet aktori i njohur William Levy në Florida, akuzohet për…
Aktori i njohur kubano-amerikan, William Levy, është arrestuar të hënën në Broward County të Floridës, në një ngjarje që ka shkaktuar reagime të shumta në rrjetet sociale. 44-vjeçari, emri i plotë i të cilit është William Gutiérrez-Levy, u ndalua nga Zyra e Sherifit në zonën e Weston dhe më pas u transferua në burgun kryesor të kontesë.
Sipas autoriteteve vendore, aktori akuzohet për dehje në një vend publik, krijim të shqetësimit dhe shkelje të rendit publik. Ngjarja, për të cilën ende nuk janë zbardhur të gjitha detajet, duket të ketë ndodhur në një zonë publike ku Levy ka qenë i pranishëm në gjendje të dehur, duke shkaktuar shqetësim te qytetarët përreth.
Levy u paraqit përpara gjykatës të martën pasdite, ku gjykatësi caktoi një garanci prej 500 dollarësh dhe lëshoi një urdhër që e ndalon atë të afrohet në zonën ku ndodhi incidenti. Deri në orët e vona të së martës, aktori vazhdonte të mbahej në paraburgim.
William Levy është një nga figurat më të dashura në botën e telenovelave latine, i njohur për rolet e tij në seriale të famshme si “Sortilegio” dhe “Cuidado con el ángel”. Ai ka pasur gjithashtu paraqitje në filma të njohur të Hollivudit si “Girls Trip” dhe “Addicted” të Tyler Perry, duke e shtrirë karrierën përtej tregut televiziv latin.
Deri më tani, as ish-partnerja e tij, Elizabeth Gutiérrez, dhe as fëmijët e tyre nuk kanë dhënë ndonjë koment lidhur me situatën.