Arratisja e dy personave nga dhomat e sigurisë në Elbasan, AMP pezullon tre punonjës policie për “Shpërdorim detyre”

Agjencia e Mbikëqyrjes Policore (AMP) ka pezulluar nga detyra tre punonjës policie në Elbasan, pas arratisjes së dy të arrestuarve nga dhomat e sigurisë së Komisariatit të Policisë Elbasan. Personat e pezulluar janë Theofan Telo, Andeta Liçi dhe Avni Bahja, të cilët akuzohen për mospërmbushje të detyrave funksionale që çuan në ngjarjen e rëndë.

Sipas njoftimit zyrtar të AMP-së, Gjykata e Shkallës së Parë në Elbasan ka vendosur masën e sigurisë “Pezullim i ushtrimit të një detyre publike” për punonjësit e policisë të dyshuar për veprën penale “Shpërdorim i detyrës”.

Punonjësit e pezulluar janë:

•Nënkomisar Theofan Telo Specialist për rendin pranë Komisariatit të Policisë Elbasan.

•Inspektor Andeta Liçi, Ndihmës Specialiste pranë Zyrës së Informacionit në Komisariat.

•Inspektor Avni Bahja Përgjegjës i dhomave të sigurisë në Drejtorinë Vendore të Policisë (DVP) Elbasan.

Nga hetimet paraprake të AMP-së, rezulton se këta punonjës nuk kanë marrë masat e duhura për të parandaluar arratisjen e dy të arrestuarve, N.L. dhe E.P., të cilët po qëndronin në dhomat e sigurisë me masën e sigurisë “Arrest në burg” për akuzën e “Vjedhjes me dhunë”.

Masa shtesë për ngjarjen:

Më 31 dhjetor 2024, AMP ndaloi me iniciativë një tjetër punonjës policie, Inspektor Dhimitër Doka, me detyrë trupë shërbimi në dhomat e sigurisë, për akuzën e “Shpërdorim i detyrës”. Gjithashtu, janë proceduar në gjendje të lirë Inspektor Avni Hamzallari dhe Inspektor Azem Bardhi të cilët mbanin detyra roje dhe përgjegjësi në dhomat e sigurisë.

Hetimet për këtë ngjarje vijojnë për të identifikuar çdo përgjegjës tjetër në strukturat e Policisë së Elbasanit.