Agresioni rus/ Qeveria shqiptare zgjat me një vit lejen e qëndrimit për qytetarët ukrainas në Shqipëri
Qeveria shqiptare ka vendosur të zgjasë me një vit afatin e qëndrimit për qytetarët ukrainas që ndodhen në Shqipëri, si pasojë e agresionit rus në Ukrainë. Vendimi është marrë sot nga Këshilli i Ministrave, duke ndryshuar zyrtarisht vendimin e datës 18 mars 2022, që parashikonte një leje qëndrimi prej tre vjetësh.
Me ndryshimin e miratuar, leja e qëndrimit për shtetasit ukrainas në territorin e Republikës së Shqipërisë është bërë katër vjet. Vendimi i ri i detyron Ministrinë e Brendshme dhe Ministrinë për Evropën dhe Punët e Jashtme që të marrin masa për zbatimin e tij.
V E N D I M
PËR
NJË NDRYSHIM NË VENDIMIN NR.169, DATË 18.3.2022, TË KËSHILLIT TË MINISTRAVE, “PËR PËRCAKTIMIN E AFATIT TË HYRJES DHE QËNDRIMIT TË SHTETASVE TË UKRAINËS NË REPUBLIKËN E SHQIPËRISË”, TË NDRYSHUAR
V E N D O S I:
1-Në pikën 1, të vendimit nr.169, datë 18.3.2022, të Këshillit të Ministrave, “Për përcaktimin e afatit të hyrjes dhe qëndrimit të shtetasve të Ukrainës në Republikën e Shqipërisë”, të ndryshuar, togfjalëshi “… 3 (tre) vjet …” zëvendësohet me “… 4 (katër) vjet …”.
2-Ngarkohen Ministria e Brendshme dhe Ministria për Evropën dhe Punët e Jashtme për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU