Aktualitet

SPAK zbardh sulmin ndaj agjentëve të BKH dhe forcave operacionale, të përfshirë nipërit e Agron Kapllanajt

16 April, 2025

Prokuroria e Posaçme ka zbardhur zyrtarisht ngjarjen e ndodhur mbrëmjen e së martës, më 15 prill, në aksin rrugor Fier–Patos, ku hetues të Byrosë Kombëtare të Hetimit dhe efektivë të Policisë së Shtetit u sulmuan gjatë kryerjes së një operacioni hetimor. Autorët e dyshuar të sulmit janë dy nipërit e Agron Kapllanajt, kandidat për deputet me partinë “Djathas 1912”, dhe një person tjetër i përfshirë në incident.

Sipas njoftimit zyrtar të SPAK, hetuesit dhe oficerët po vepronin në kuadër të një hetimi të deleguar nga Strukturat e Posaçme kundër Korrupsionit dhe Krimit të Organizuar. Në momentin që po kryenin detyrën e tyre, ata u sulmuan pa asnjë motiv nga persona tashmë të identifikuar dhe të shoqëruar në Drejtorinë Vendore të Policisë Fier.

Njoftimi i SPAK:

Byroja Kombëtare e Hetimit konfirmon sulmin që ndodhi mbrëmjen e datës 15 Prill kundër hetuesve të Byrosë Kombëtare të Hetimit dhe oficerëve të Policisë së Shtetit në qarkun e Fierit.

Hetuesit e BKH-së dhe efektivët e Policisë së Shtetit po kryenin detyra hetimore të deleguara, në kuadër të një hetimi të Strukturës së Posaçme kundër Korrupsionit dhe Krimit të Organizuar.

Mbështetur në informacionin e përcjellë nga Drejtoria Vendore e Policisë, Fier (DVP) dhe verifikimet e kryera, ngjarja ka ndodhur rreth orës 19:20 minuta, në aksin Fier – Patos. Ndërsa hetuesit e BKH-së dhe oficerët e Policisë së Shtetit po kryenin detyrën, janë sulmuar pa asnjë motiv nga persona tashmë të identifikuar dhe shoqëruar në DVP, Fier.

Të gjitha veprimet hetimore dhe proceduriale lidhur me ngjarjen janë duke u kryer nga Prokuroria e Juridiksionit të Përgjithshëm, Fier.

SPAK nënvizon se të gjitha veprimet e ndërmarra nga BKH janë në përputhje me ligjin dhe nën vëzhgimin direkt të prokurorëve të posaçëm.

SPAK u bën thirrje qytetarëve të bashkëpunojnë me institucionet e drejtësisë dhe të respektojnë autoritetin e hetuesve dhe Policisë së Shtetit që veprojnë në zbatim të detyrës së tyre. Integriteti dhe siguria e hetuesve të BKH-së dhe efektivëve të Policisë së Shtetit është thelbësore në angazhimin tonë për të luftuar korrupsionin dhe krimin e organizuar.